اکثرنوجوان قطروں کی شکایت کرتے ہیں۔ایسے نوجوان نہ صرف کمزوری محسوس کرتے ہیں بلکہ کپڑوں کو ناپاک سمجھ کر نماز نہیں پڑھتے۔یہ قطرے کیا ہیں؟جب بھی کوئی فرد خصوصاََ غیر شادی شدہ نوجوان

Sex

کے حوالے سے سوچتا ہے،تصور کرتا ہے یا جنسی بات سنتا ہے کوئی جنسی کتاب پڑھتا ہے۔نگی تصویر دیکھتا ہے یا جنسی مخالف کو دیکھتا یا اس سے باتیں کرتا ہے تو جنسی ہیجان کی وجہ سے اس کے ذَکرسے سفید لیسدار رطوبت خارج ہو جاتی ہے۔یہ رطوبت کبھی تناؤ کے ساتھ خارج ہوتی ہے جبکہ اکثر شہوت اور تناؤ کے بغیرخارج ہو جاتی ہے۔یہ اسی طرح ہے جس طرح مٹھائی کو دیکھ کر فرد کے منہ میں پانی بھر آتا ہے۔(املی یا کھٹی چیزیں دیکھ کر بھی منہ میں پانی آجاتاہے) منی کی تھیلیاں سکڑ کر منی کے ایک دو قطرے بغیر لطف کے خارج کر دیتی ہیں۔یہ کوئی بیماری اور خطرناک چیز نہیں اور نہ ہی اس کے کسی بھی طرح کوئی نقصانات ہیں۔

اکثر یہ رطوبت منی کی بجائے پراسٹیٹ غدود سے نکلنے والا مادہ

(Discharge Prostate)

ہوتا ہے۔یہ مادہ کسی کا زیادہ اور کسی کا کم نکلتا ہے۔اسی طرح یہ رطوبت کسی فرد کی گاڑھی اور کسی کی پتلی ہوتی ہے۔کچھ نیم حکیم اسے بھی جریان کہتے ہیں اور نوجوانوں کو بے حد خوف زدہ کرتے ہیں کہ اس سے فرد جنسی طور پر کمزور ہو جاتا ہے اور شادی کے قابل نہیں رہتا۔حالا نکہ جدید تحقیق سے معلوم ہوا ہے کہ یہ مادہ ایک خاص حکمت کے تحت خارج ہوتا ہے۔

کیونکہ انسان جب بھی سیکس کے حوالے سے سوچتا ہے تو اگلا قدم مباشرت ہی ہوتی ہے۔قدرت انسان کو اس کام کے لیے تیار کر دیتی ہے اور کچھ چکنا مادہ نکل کر ذَکر کے منہ پر آجاتا ہے جو بطور چکناہٹ

(Lubricant)

کام دیتا ہے جس کی وجہ سے ذَکر کا منہ چکنا ہو جاتا ہے جس سے دخول

(Penetration)

آسان ہو جاتا ہے۔جدید تحقیق سے یہ بات ثابت ہو چکی ہے کہ اس رطوبت کا اخراج کسی بھی طرح سے نقصان دہ نہیں۔

اس کے علاوہ زیادہ جنسی ہیجان میں اور انزال سے قبل ایک دو قطرے ایک شفاف مادے کے بھی خارج ہو جاتے ہیں۔یہ منی نہیں ہوتی بلکہ کوپرگلینڈ سے نکلے والامادہ ہوتا ہے جس کو قدرت ایک اور خاص مقصد کے تحت انزال سے پہلے خارج کرتی ہے۔ذَکرکی نالی میں پیشاب کی وجہ سے سخت تیزابیت پیدا ہو جاتی ہے اور اگر اس تیزابیت کو ختم کیے بغیر ہی منی خارج ہو جائے تو تیزابیت کی وجہ سے نطفے

(Sperms)

مر جائیں اور انسان کی پیدائش نہ ہو۔لہٰذا یہ مادہ پیشاب کی نالی کی تیزابیت کو ختم کرتا ہے۔اس کے علاوہ یہ پیشاب کی نالی کو بھی چکنا کر دیتا ہے جس وجہ سے منی کا اخراج آسان ہو جاتا ہے۔بصورت دیگر گاڑھی منی کا اخراج مشکل اور لطف کی بجائے جسمانی تکلیف کا سبب بن جائے۔بعض اوقات بظاہر بغیر کسی جنسی ہیجان کے بھی یہ مادہ خارج ہو جاتا ہے ایسی صورت میں جنسی ہیجان لاشعوری ہوتاہے جس سے اگرچہ فرد آگاہ نہیں ہوتا مگر اس کے رد عمل میں رطوبت خارج ہو جاتی ہے۔اگرچہ یہ کوئی بیماری نہیں مگر نیم حکیموں کے زبردست پراپیگنڈہ کی وجہ سے نوجوان اسے بیماری سمجھ لیتے ہیں اور پھر توقع

(Expectation)

کی وجہ سے کمزوری محسوس کرنے لگتے ہیں کیونکہ انسان جیسے سوچتا ہے ویسے ہو جاتا ہے۔

(ذاکر:مبین:Kothari)

چونکہ منی اور پیشاب کے اخراج کی ایک ہی نالی ہے چنانچہ جنسی طور پر مشتعل ہونے پر پیشاب سے پہلے اور بعد سفید مواد کا اخراج ایک نارمل عضویاتی عمل

(Process)

ہے نہ کہ کوئی بیماری۔چنانچہ اس سلسلے میں فکر مند ہونے کی ضرورت نہیں۔البتہ اگر جنسی اشتعال میں یہ مادہ خارج نہیں ہوتا تو بات فکر کی ہے۔

اس حوالے سے ایک اور اہم بات ذہن میں رہے کہ ان قطروں سے کپڑے ناپاک نہیں ہوتے اور نہ ہی اس سے غسل فرض ہو جاتا ہے۔ان قطروں کے بعد ذَکر کو دھولینا کافی ہے۔کپڑوں کو دھونے کی ضرورت نہیں۔ان پر صرف پانی چھڑک لیا جائے اور غسل کی بجائے صرف وضو کر لیا جائے۔اللہ کے نبی  ﷺ کے ایک مشہور صحابیؓ  کو یہ مسئلہ تھا، تو آپ  ﷺ سے مسئلہ پوچھا گیا۔تو آپ  ﷺ نے فرمایا کہ عضوء کودھوکر،کپڑوں پر پانی چھڑک لیا جائے اوروضو کر لیا جائے۔(مسلم) ان قطروں کو ہمارے ہاں عموماََ مذی کہا جاتا ہے۔